Хорвоод мэндэлж бие хүн болон төлөвшиж эхэлсэн, суралцсан, хөгжсөн, алдсан, оносон,ухаарсан , уучилсан, уучлуулсан, амжилтын өөд өгссөн, уруудсан, гуньсан, гээд л бүхий л цаг мөчид өөр өөр орчинд, янз бүрийн хүмүүстэй харьцаж байсан ч би гэдэг хүн ямар ч тохиолдолд зөвхөн өөрөө өөртөө л үнэ цэнээ алдаагүй харин хамгийн ихээр өөгшүүлж, эрхлүүлж, онгироож, дэмжиж, бахархаж өөрөө өөртөө итгэж, үргэлж үнэ цэнэтэй хэвээр байсаар ирсэн гэнэм. Өөртөө итгэлтэй, өөрийн үнэ цэнээ бүрэн мэдэрч чадсан хүн арагшаа ухарч биш, үргэлж урагшаа тэмүүлж амьдарч чаддаг гэдэг би итгэдэг. Хорвоод би гэдэг нэгэн бодгалийг бусдад хүн хэмээн таниулж яваа зүйл бол миний бие юм. Тэгэхээр өөрийнхөө би хэмээх бие сэтгэлийг бүрэн хайрлаж байж бусдыг хайрлах ухаан танаас ундрах учиртай.
Ер нь одоо байгаа амьдрал, ялалт амжилтандаа үргэлж талархаж тэр бүхнээ хайрлаж явах юм бол маш олон шийдэхэд бэрхшээлтэй байсан асуудлуудтайгаа нүүр тулахаас айлгүй, түүнийг даван гарах хүч чадлыг өөртөө хуримтлуулж чаддаг юм. Энэ бол нэгэн ёсны бидний ярьдагаар ухаан юм. Хүнд амьтдаас ялгаатай нь эргэцүүл, бод, сана, сэр гэж толгой заяасан. Эргэцүүлэхгүй , ухаарахгүй юм бол хүн болж амьдарсны хэрэг байхгүй шүү дээ. Алдаа бүхнээ ухаарч , эргэцүүлж, бодож чадахгүй л юм бол та адгуусан зөнд хувирч, бодох , сэтгэх толгойгүй адгууснаас ялгаа үгүй болох биш үү.
Учир юун хэмээвээс өөртөө итгэлгүй, өөрийгөө үнэлдэггүй, мэдэрдэггүй , таньж чадаагүй хүн бусдыг хэзээ ч бүрэн таньж , мэдэрч, ойлгож, үнэлж, дүгнэж чаддаггүй. Энэ бол батлагдсан дүрэм биш ч амьдрал дээр бол бодит үнэн юм. Мөн ардын минь сайхан үгээр бол "Өөрийн толгой дээрх бухлыг мэдрэхгүй байж бусдын толгой дээрх өвсийг олж харах" гэдэг үгтэй агаар нэгэн билээ.
Харин, сэтгэл дотроо атаа хорсол, гуниг харамсал,алдаа дутагдал, хов жив, мунхаглал, муу муухай болгоныг тээж, тэр сэтгэлээрээ амьдарч, тэр ухаанаараа өөрийгөө илэрхийлж, тэр байдлаараа бусдад хандаж, өдөр бүр өөрийнхөө үнэ цэнийг алдаж, би гэсэн орон зайгаа буртаглан яваа өчүүхэн хүмүүс хичнээн байна вэ. Тэд хамгийн эхлээд өөрийгөө бүрэн таньж мэдэрчихээд, алдаа дутагдлаа засч, ухаан санаагаа удирддаг болчихоод,өөрийнхөө үнэ цэнийг бүрэн мэдэрч, муу муухайг ялгаж салгадаг болчихоод, саруул ухаанаар ажиллаж амьдраасай гэж ямар их хүснэ вэ.
Өөртөө итгэлтэй, өөрийгөө хүндэлж байна гэдэг нь амьдралаа хүндэлж байна гэсэн үг юм. Амьдралаа хүндлэнэ гэдэг нь эргээд та өөрийнхөө хийж бүтээснийг ч, бусдын сэтгэлийг хүндэлж байна гэсэн үг юм. Ингэхээр та өөрийгөө хүндэлж хайрладаг , өөрийн үнэ цэнээ мэдэрдэг болчих юм бол энэ орчлонгийн бүх юманд талархаж чадна гэсэн үг юм.
Эцэст нь дүгнэж хэлэхэд энэ хорвоогийн эгэл гэрлийн дор амьдарч яваа хүн бүр өөрөө өөртөө итгэж, урамшуулж, буруу зөвийг ялгаж салгах ухаанаа хөгжүүлж, тухайн орчиндоо өөрийн үнэ цэнээ алдахгүй ухаалаг байж чадвал амжилт гэдэг найз ар араасаа тань руу урсаж, байгууллагаа, сумаа, аймгаа, улсаа хөгжүүлэхэд том хөрөнгө оруулалт болно гэдэгт итгэлтэй байна. Үүнийг уншигч хөмүүн та өөрийн үнэ цэнээ мэдэрч, өрөөлийн төлөө сэтгэл зүрхээ зориулан, амжилтын төлөө алхам алхмаар урагшлах болтугай.\Ямар ч тохиолдолд амжилтын оргил руу аажим мацаж хүрдэг болохоос шууд харайгаад гарчихна гэсэн ойлголт байдаггүй юм шүү.\
Хүмүүс ээ, бүгдээрээ өөрөө өөртөө итгэж, өөрсдийнхөө үнэ цэнийг мэдэрч, эцэст нь бусдад мэдрүүлж, амжилтын алтан түлхүүрийг атган, улсынхаа хөгжил дэвшилд оюун ухааны хөрөнгө оруулалт хийцгээеэ.
